بسم الله الرحمن الرحيم
بمزيد من الحزن والاسي انعي الوطن الذي يحتضر علي يد ابنائه مؤيدين ومعارضين
واخاطب الرجل الذي يريد ان ينال الشهادة في محيط رابعة او دار الحرس الجمهوري او ميدان التحرير بل وفي كل ميادين ومحافظات مصر
روح يا مصر احصل علي الشهادة وانت رافع سلاحك في وجه جندي مصري زيه زيك
احصل علي الشهادة من جندي مسلم زيه زيك
احصل علي الشهادة وانت بتهاجم جندي كل ذنبه انه حمل سلاحه علشان يدافع بيه عنك
احصل علي الشهادة من جندي رفع درعه وبيتصدي لحجارتك ورصاصتك وكانه اسرائيلي وانت مصري
احصل علي الشهادة وانت بتحرر مصر من جيشها وسيب القدس في فلسطين تنتهك مقدساته باقدام الصهاينة
روح اسمع كلام صفوت والبرادعي وكل واحد منهم بيولعها نار والاخر يروح بيته وسط ولاده ويقعد علي فيس بوك او تويتر ويكتب تغريدة او بوست يعلق بيه علي الحالة
روح يا مصر احصل علي الشهادة بعد ماكنت بترفع ايدك وتحطها علي كتف اخوك المصري وبتشيله في معارك كثيرة مع العدو الحقيقي دلوقتي بقت ايدك بتتمد بالسلاح عليه
روح ياجندي انت كمان دافع عن نفسك واقتلك عشرة ولا عشرين
يلا يا مصرين مش دا اللي احنا عايزينه
اما الكرسي والكرامة او الخراب والدمار والخيانة
روح مصري امشي ورا بلتاجي وهو بيقول نطالب المجتمع الدولي بالتدخل لحماية المعتصمين
روح يامصري وهايكتب التاريخ انك كنت سبب ان قوات التحالف تدخل بيتك وتغتصب اهلك وتنتهك عرضك مانت اللي دخلتها هنا
روح يا مصري ارحم اهل جندي ولا اهل مصري زيك انهم يقضوا مع ابنهم شهر كريم ويفرحوا زي مانت هاتقتل وهاتروح تصوم وسط ولادك وتفرح بدم اخوك علي ايدك
روح يامصري ووقت كل فرحة اوعي تنسي ان قلبك اسود وايدك احمرت واتلوثت بدم اخوك جندي في الجيش او عسكري في الشرطة او متظاهر زيه زيك
روح يا مصري وانت بتلعب مع اولادك افتكر ولاد اللي قتلته وحرمتهم منه
روح يا مصري مبروك عليك بجد مبروك عليك
بعد اللي شوفته من قوات الحرس الجمهوري وهي بترفع الدرع وتتلقي بيه الحجارة والمولوتوف
في الفيديوا الجقيقي اللي الجيش صوره بالطيران
وبعد المنشو ر دا
اعاهد الله اني لن اتحدث في السياسة مرة ثانية
لن اشارك في اي منشور سياسي
لن استفز او أًستفز
لن اشارك بمنشور خايب علي فيس بوك ومصر بتولع
كفاية يا اخواتنا كفاية ولعة البلد بتضيع مننا
ايه الداعي لكل دا
كرسي
منصب
وبعدين
قبر متر في متر
عايز تخدم مصر تقدر تخدمها وانت في مكانك من غير كرسي ومنصب
تقدر تحافظ عليها
تقدر تدافع عن جيشها وتسانده وتدعيله ربنا يحميه ويقويه علي حماية الارض والعرض
تقدر تخدم وطنك انك تستثمر طاقتك وجهدك في ارض مصر بدل ما تضيع جهدك علي حرب اخوك
يارب احفظ مصر واهلها وجيشها وشعبها وتاريخها وحضارتها ولا تجعل باسنا بيننا شديدا
حببنا في بعضنا وانزع الغل والحقد من قلوبنا وصدرونا الف بين قلوبنا وحد كلمتنا واجمعنا علي قول لا اله الا الله محمد رسول الله
الشيخ محمد طلعت القطاوي
